aah dil par asar na ho jae

aah dil par asar na ho jaa.e

husn kī aañkh tar na ho jaa.e

dāġh-e-dil kī taraqqīyāñ tauba

ye sitāra qamar na ho jaa.e

āshiyāñ to banā rahā huuñ magar

bijliyoñ ko ḳhabar na ho jaa.e

Dar hai gulshan kā āshiyāñ kā nahīñ

nazr-e-barq-o-sharar na ho jaa.e

rāz-e-dil is liye nahīñ kahtā

ishq nā-mo'tabar na ho jaa.e

dil se un ko bhulā to duuñ lekin

zindagī talḳh-tar na ho jaa.e

aate aate qarīb manzil ke

bad-gumāñ rāhbar na ho jaa.e

shaam aisī nahīñ koī 'aḳhtar'

jis kī paidā sahar na ho jaa.e

aah dil par asar na ho jae

husn ki aankh tar na ho jae

dagh-e-dil ki taraqqiyan tauba

ye sitara qamar na ho jae

aashiyan to bana raha hun magar

bijliyon ko KHabar na ho jae

Dar hai gulshan ka aashiyan ka nahin

nazr-e-barq-o-sharar na ho jae

raaz-e-dil is liye nahin kahta

ishq na-mo'tabar na ho jae

dil se un ko bhula to dun lekin

zindagi talKH-tar na ho jae

aate aate qarib manzil ke

bad-guman rahbar na ho jae

sham aisi nahin koi 'aKHtar'

jis ki paida sahar na ho jae