aah duniya sara-e-fani hai

aah duniyā sarā-e-fānī hai

kis qadar muḳhtasar kahānī hai

ḳhud ko detā huuñ muskurā ke fareb

dil magar vaqf-e-nauha-ḳhvānī hai

mujh se hañs-bol leñ mire sāthī

ab koī din kī zindagānī hai

mausam-e-gul meñ vo jo aan mileñ

ham bhī jāneñ ki rut suhānī hai

be-sabab to nahīñ bahe aañsū

aañsū aañsū meñ ik kahānī hai

ik sarāpā ki ranj-o-yās haiñ ham

dard-e-dil monis-e-javānī hai

muskurā.ūñ maiñ kis tarah 'altāf'

taak meñ daur-e-āsmānī hai

aah duniya sara-e-fani hai

kis qadar muKHtasar kahani hai

KHud ko deta hun muskura ke fareb

dil magar waqf-e-nauha-KHwani hai

mujh se hans-bol len mere sathi

ab koi din ki zindagani hai

mausam-e-gul mein wo jo aan milen

hum bhi jaanen ki rut suhani hai

be-sabab to nahin bahe aansu

aansu aansu mein ek kahani hai

ek sarapa ki ranj-o-yas hain hum

dard-e-dil monis-e-jawani hai

muskuraun main kis tarah 'altaf'

tak mein daur-e-asmani hai