aah hum hain aur shikasta-paiyan

aah ham haiñ aur shikasta-pā.iyāñ

ab kahāñ vo bādiya-paimā.iyāñ

bahr-e-ġham hai aur dil-e-ḳhalvat-pasand

baada hī baada hai aur gahrā.iyāñ

ġhaflateñ ab sū-e-manzil le chalīñ

hotī jaatī haiñ ḳhajil dānā.iyāñ

mere talvoñ ke lahū kā faiz hai

ye kahāñ thiiñ dasht meñ ra.anā.iyāñ

farq kyā hai zindagī o maut meñ

uf mohabbat kī qayāmat-zā.iyāñ

phir na ubhrā jo koī Duubā yahāñ

uf-re bahr-e-ishq kī gahrā.iyāñ

josh-e-tūfāñ hai ki maujoñ kā ḳharosh

ab liye hai god meñ gahrā.iyāñ

le uḌā nashsha ḳhayāl-e-yār kā

aa ga.iiñ ham ko falak-paimā.iyāñ

donoñ aalam Duub kar gum ho ga.e

allāh allāh qalb kī gahrā.iyāñ

sar se ūñchā ho gayā paanī 'jigar'

muntazir thiiñ bahr kī gahrā.iyāñ

aah hum hain aur shikasta-paiyan

ab kahan wo baadiya-paimaiyan

bahr-e-gham hai aur dil-e-KHalwat-pasand

baada hi baada hai aur gahraiyan

ghaflaten ab su-e-manzil le chalin

hoti jati hain KHajil danaiyan

mere talwon ke lahu ka faiz hai

ye kahan thin dasht mein ranaiyan

farq kya hai zindagi o maut mein

uf mohabbat ki qayamat-zaiyan

phir na ubhra jo koi Duba yahan

uf-re bahr-e-ishq ki gahraiyan

josh-e-tufan hai ki maujon ka KHarosh

ab liye hai god mein gahraiyan

le uDa nashsha KHayal-e-yar ka

aa gain hum ko falak-paimaiyan

donon aalam Dub kar gum ho gae

allah allah qalb ki gahraiyan

sar se uncha ho gaya pani 'jigar'

muntazir thin bahr ki gahraiyan