aah lab tak dil-e-nakaam na aane pae

aah lab tak dil-e-nākām na aane paa.e

zabt-e-ġham par koī ilzām na aane paa.e

maiñ sunātā to huuñ rūdād-e-mohabbat lekin

darmiyāñ meñ jo tirā naam na aa.e paa.e

tum ne chāhā bhī to kyā dushman-e-rāhat ban kar

koī duniyā meñ mire kaam na aane paa.e

mahfil-e-ishq meñ chhā jā.egā ik sannāTā

yuuñ taḌaptā huuñ ki ārām na aane paa.e

dekh paa.e na sitāroñ kī nazar bhī tum ko

aao is tarah ki ilzām na aane paa.e

manzil-e-shauq meñ kahtā hai junūñ mujh se 'adīb'

dil meñ andesha-e-anjām na aane paa.e

aah lab tak dil-e-nakaam na aane pae

zabt-e-gham par koi ilzam na aane pae

main sunata to hun rudad-e-mohabbat lekin

darmiyan mein jo tera nam na aae pae

tum ne chaha bhi to kya dushman-e-rahat ban kar

koi duniya mein mere kaam na aane pae

mahfil-e-ishq mein chha jaega ek sannaTa

yun taDapta hun ki aaram na aane pae

dekh pae na sitaron ki nazar bhi tum ko

aao is tarah ki ilzam na aane pae

manzil-e-shauq mein kahta hai junun mujh se 'adib'

dil mein andesha-e-anjam na aane pae