aah lab tak dil-e-nakaam na aane pae

aah lab tak dil-e-nākām na aane paa.e

azmat-e-ishq pe ilzām na aane paa.e

ham se qaa.em tire maiḳhāne kī azmat saaqī

aur ham tak hī koī jaam na aane paa.e

zer-e-tartīb hai tārīḳh-e-rivāyāt-e-vatan

hukm hai is meñ mirā naam na aane paa.e

terī āñkhoñ ke agar hoñ na ishāre saaqī

jaam meñ bāda-e-gulfām na aane paa.e

muzhda ai ahl-e-chaman aa to ga.ī sub.h-e-bahār

ab zarūrat hai ki phir shaam na aane paa.e

dil-shikan yuuñ to hai anjām-e-mohabbat lekin

dil meñ andesha-e-anjām na aane paa.e

hai talabgār-e-masarrat to zabāñ par ai dost

shikva-e-gardish-e-ayyām na aane paa.e

pī ke thoḌī sī bahak jaatā hai saaqī ne kahā

bazm meñ ‘aḳhtar’-e-badnām na aane paa.e

aah lab tak dil-e-nakaam na aane pae

azmat-e-ishq pe ilzam na aane pae

hum se qaem tere maiKHane ki azmat saqi

aur hum tak hi koi jam na aane pae

zer-e-tartib hai tariKH-e-riwayat-e-watan

hukm hai is mein mera nam na aane pae

teri aankhon ke agar hon na ishaare saqi

jam mein baada-e-gulfam na aane pae

muzhda ai ahl-e-chaman aa to gai subh-e-bahaar

ab zarurat hai ki phir sham na aane pae

dil-shikan yun to hai anjam-e-mohabbat lekin

dil mein andesha-e-anjam na aane pae

hai talabgar-e-masarrat to zaban par ai dost

shikwa-e-gardish-e-ayyam na aane pae

pi ke thoDi si bahak jata hai saqi ne kaha

bazm mein ‘aKHtar’-e-badnam na aane pae