aah-o-nala hai ashk-bari hai

āh-o-nāla hai ashk-bārī hai

hijr meñ shakl ye hamārī hai

sub.h-e-vasl ab nasīb ho ki na ho

hijr kī raat ham pe bhārī hai

mar-miTe ham to tum pe aur tumheñ

aaj tak ham se parda-dārī hai

terī shamshīr-e-hijr kā qātil

dil-e-āshiq pe zaḳhm-e-kārī hai

un kī jānib se hai ġhurūr-e-sitam

merī jānib se inkisārī hai

haiñ jo sarshār-e-bāda-e-ulfat

un kī azmat bhī hoshiyārī hai

qatl-e-ushshāq ke liye qātil

nigah-e-nāz kī kaTārī hai

bosa apnī jabīñ kā deñ vo hameñ

aisī qismat kahāñ hamārī hai

shaam se hijr-e-yār meñ tā-sub.h

ham ne ro ro ke shab guzārī hai

be-hijābī hai terī dushman se

aur āshiq se parda-dārī hai

aap ke husn kī malāhat se

paanī chāh-e-zaqan kā khārī hai

ḳhat-e-ruḳhsār-e-yār ai 'sābir'

bāġh-e-jannat kī sabz kyārī hai

aah-o-nala hai ashk-bari hai

hijr mein shakl ye hamari hai

subh-e-wasl ab nasib ho ki na ho

hijr ki raat hum pe bhaari hai

mar-miTe hum to tum pe aur tumhein

aaj tak hum se parda-dari hai

teri shamshir-e-hijr ka qatil

dil-e-ashiq pe zaKHm-e-kari hai

un ki jaanib se hai ghurur-e-sitam

meri jaanib se inkisari hai

hain jo sarshaar-e-baada-e-ulfat

un ki azmat bhi hoshiyari hai

qatl-e-ushshaq ke liye qatil

nigah-e-naz ki kaTari hai

bosa apni jabin ka den wo hamein

aisi qismat kahan hamari hai

sham se hijr-e-yar mein ta-subh

hum ne ro ro ke shab guzari hai

be-hijabi hai teri dushman se

aur aashiq se parda-dari hai

aap ke husn ki malahat se

pani chah-e-zaqan ka khaari hai

KHat-e-ruKHsar-e-yar ai 'sabir'

bagh-e-jannat ki sabz kyari hai