aah sharminda-e-asar na hui

aah sharminda-e-asar na huī

koī tadbīr kārgar na huī

multafit aap kī nazar na huī

shāḳh-e-ummīd bārvar na huī

ham ne din jis jagah guzār diyā

raat apnī vahāñ basar na huī

'aib auroñ ke DhūñDte haiñ ham

apne afa.āl par nazar na huī

qissa-e-ġham agar na thā kotāh

zindagānī bhī muḳhtasar na huī

rah ga.ī dil meñ dāġh-e-dil ban kar

vo tamannā jo bārvar na huī

daad do mere zabt-e-ġham kī mujhe

dil bhī royā to chashm tar na huī

mere taḳh.īl kī bulandī bhī

kabhī mohtāj-e-bāl-o-par na huī

ḳhūbiyāñ dekhiye muqaddar kī

ho ga.ī shaam to sahar na huī

un se milne kī aarzū puurī

baat mumkin sahī magar na huī

dil pe guzre vo hādse 'shankar'

ik ghaḌī chain se basar na huī

aah sharminda-e-asar na hui

koi tadbir kargar na hui

multafit aap ki nazar na hui

shaKH-e-ummid barwar na hui

hum ne din jis jagah guzar diya

raat apni wahan basar na hui

'aib auron ke DhunDte hain hum

apne afaal par nazar na hui

qissa-e-gham agar na tha kotah

zindagani bhi muKHtasar na hui

rah gai dil mein dagh-e-dil ban kar

wo tamanna jo barwar na hui

dad do mere zabt-e-gham ki mujhe

dil bhi roya to chashm tar na hui

mere taKHil ki bulandi bhi

kabhi mohtaj-e-baal-o-par na hui

KHubiyan dekhiye muqaddar ki

ho gai sham to sahar na hui

un se milne ki aarzu puri

baat mumkin sahi magar na hui

dil pe guzre wo hadse 'shankar'

ek ghaDi chain se basar na hui