aah zaKHmi hai dil shikasta hai

aah zaḳhmī hai dil shikasta hai

haa.e āñkhoñ se ḳhuuñ barastā hai

ho ga.ī haiñ lahū lahū sāñseñ

ruuh ko aa ke koī Dastā hai

aa gayā hai to jā nahīñ saktā

dil key duniyā meñ koī bastā hai

farq koī nahīñ hai donoñ meñ

zindagī maut hī kā rasta hai

saarī duniyā meñ mahñgā hai paanī

ḳhuuñ zamāne meñ aaj sastā hai

laash apnī liye bhaTaktā huuñ

jism hai ruuh ko tarastā hai

ek dil hī nahīñ hai ai 'tauqīr'

ruuh zaḳhmī hai jism ḳhasta hai

aah zaKHmi hai dil shikasta hai

hae aankhon se KHun barasta hai

ho gai hain lahu lahu sansen

ruh ko aa ke koi Dasta hai

aa gaya hai to ja nahin sakta

dil key duniya mein koi basta hai

farq koi nahin hai donon mein

zindagi maut hi ka rasta hai

sari duniya mein mahnga hai pani

KHun zamane mein aaj sasta hai

lash apni liye bhaTakta hun

jism hai ruh ko tarasta hai

ek dil hi nahin hai ai 'tauqir'

ruh zaKHmi hai jism KHasta hai