aahista boliyega tamasha khaDa na ho

āhista boliyegā tamāshā khaḌā na ho

bairūn-e-ḳhvāb koī hameñ sun rahā na ho

dīvāreñ uTh ga.ī na hoñ dasht-e-junūn meñ

ram-ḳhurda vo ġhazāl kahīñ gum-shuda na ho

raḳht-e-safar meñ bāñdh leñ pur-shor kuchh bhañvar

dariyā hai pur-sukūn safar be-maza na ho

yuuñ to vo ek aam sā patthar hai miil kā

lekin vahāñ se aage agar rāsta na ho

masjid pukārtī rahī hayya-alal-falāh

jaise hamārā apnā koī falsafa na ho

ham kaaT deñge umr kī zanjīr ek din

ham-zād karb-e-dīd se shāyad rihā na ho

ik chāñd mujh ko tāktā rahtā hai in dinoñ

jaise sivā.e mere koī ā.īna na ho

hañs hañs ke us se bāteñ kiye jā rahe ho tum

'sābir' vo dil meñ aur hī kuchh sochtā na ho

aahista boliyega tamasha khaDa na ho

bairun-e-KHwab koi hamein sun raha na ho

diwaren uTh gai na hon dasht-e-junun mein

ram-KHurda wo ghazal kahin gum-shuda na ho

raKHt-e-safar mein bandh len pur-shor kuchh bhanwar

dariya hai pur-sukun safar be-maza na ho

yun to wo ek aam sa patthar hai mil ka

lekin wahan se aage agar rasta na ho

masjid pukarti rahi hayya-alal-falah

jaise hamara apna koi falsafa na ho

hum kaT denge umr ki zanjir ek din

ham-zad karb-e-did se shayad riha na ho

ek chand mujh ko takta rahta hai in dinon

jaise siwae mere koi aaina na ho

hans hans ke us se baaten kiye ja rahe ho tum

'sabir' wo dil mein aur hi kuchh sochta na ho