آہوں میں ہو تاثیر کہ نالوں میں اثر ہو

آہوں میں ہو تاثیر کہ نالوں میں اثر ہو

اللہ کسی طرح شب غم کی سحر ہو

اتنا تو ہو جنبش میں جو وہ پردۂ در ہو

جھک جائے عقیدت سے وہ سر ہو کہ نظر ہو

ہم یاد سے ان کی کبھی غافل نہ رہیں گے

اچھا ہے جو پیہم خلش درد جگر ہو

کیا جانئے کب ہونے لگے پرسش احوال

کیا جانئے کس وقت مخاطب وہ نظر ہو

کیا لطف ہے محفل میں ہوں سب گوش بر آواز

ہم جس سے کریں بات اسی کو نہ خبر ہو

سچ جان ترے غم میں اب آنسو نہ بہیں گے

آلودۂ عصیاں ہو جو دامن مرا تر ہو

دیتا ہے یہ در پردہ تسلی سی جو کوئی

شاید کہ مرے غم کی حزیںؔ ان کو خبر ہو