aai bahaar shorish-e-tiflan ko kya hua

aa.ī bahār shorish-e-tiflāñ ko kyā huā

ahl-e-junūñ kidhar ga.e yārāñ ko kyā huā

ġhunche lahū meñ tar nazar aate haiñ tah-ba-tah

is rashk-e-gul ko dekh gulistāñ ko kyā huā

yāqūt-e-lab tirā huā kyuuñ ḳhat se jurm-vār

zālim ye rashk-e-la.al-e-badaḳhshāñ ko kyā huā

us jāma-zeb ġhuncha-dahan ko chaman meñ dekh

hairāñ huuñ maiñ ki gul ke garebāñ ko kyā huā

aane se tere ḳhat ke ye kyuuñ dil-e-girafta hai

batlā ki terī zulf-e-pareshāñ ko kyā huā

kyuuñ gard baad se ye uḌātā hai sar pe ḳhaak

huuñ maiñ to jā-e-qais bayābāñ ko kyā huā

rote hī tere ġham meñ guzartī hai us kī umr

pūchhā kabhī na tū ne ki 'tābāñ' ko kyā huā

aai bahaar shorish-e-tiflan ko kya hua

ahl-e-junun kidhar gae yaran ko kya hua

ghunche lahu mein tar nazar aate hain tah-ba-tah

is rashk-e-gul ko dekh gulistan ko kya hua

yaqut-e-lab tera hua kyun KHat se jurm-war

zalim ye rashk-e-lal-e-badaKHshan ko kya hua

us jama-zeb ghuncha-dahan ko chaman mein dekh

hairan hun main ki gul ke gareban ko kya hua

aane se tere KHat ke ye kyun dil-e-girafta hai

batla ki teri zulf-e-pareshan ko kya hua

kyun gard baad se ye uData hai sar pe KHak

hun main to ja-e-qais bayaban ko kya hua

rote hi tere gham mein guzarti hai us ki umr

puchha kabhi na tu ne ki 'taban' ko kya hua