aai hai aise gham mein rawani parat parat

aa.ī hai aise ġham meñ ravānī parat parat

bahne lagā hai aañkh se paanī parat parat

bāñdhā hai jab se tere tasavvur ko sher meñ

sheroñ ke khul rahe haiñ ma.ānī parat parat

chhāyā rahā ho jaise buḌhāpā nafas nafas

guzrī hai aise apnī javānī parat parat

dil ke varaq varaq pe tirā naam sabt hai

ik tū hī dhaḌkanoñ meñ hai jaanī parat parat

gard-o-ġhubār ġham se aTī hai fazā fazā

hotī thī koī rut jo suhānī parat parat

lekin banā na qais kī sūrat hamārā naam

sahrā kī ḳhaak ham ne bhī chhānī parat parat

koī javāz de na sakā merī baat kā

us ne ġhalat kahā hai zabānī parat parat

yādeñ dilā rahī hai sitamgar kī baar baar

mujh ko rulā rahī hai nishānī parat parat

hāsil karūñgā jaise bhī mumkin huā use

maiñ ne 'nabīl' dil meñ hai Thānī parat parat

aai hai aise gham mein rawani parat parat

bahne laga hai aankh se pani parat parat

bandha hai jab se tere tasawwur ko sher mein

sheron ke khul rahe hain maani parat parat

chhaya raha ho jaise buDhapa nafas nafas

guzri hai aise apni jawani parat parat

dil ke waraq waraq pe tera nam sabt hai

ek tu hi dhaDkanon mein hai jaani parat parat

gard-o-ghubar gham se aTi hai faza faza

hoti thi koi rut jo suhani parat parat

lekin bana na qais ki surat hamara nam

sahra ki KHak hum ne bhi chhani parat parat

koi jawaz de na saka meri baat ka

us ne ghalat kaha hai zabani parat parat

yaaden dila rahi hai sitamgar ki bar bar

mujh ko rula rahi hai nishani parat parat

hasil karunga jaise bhi mumkin hua use

main ne 'nabil' dil mein hai Thani parat parat