aai hai phir bahaar kya kahna

aa.ī hai phir bahār kyā kahnā

chashm haiñ ashk-bār kyā kahnā

misl-e-sīmāb muztarib kyoñ hai

ai dil-e-be-qarār kyā kahnā

ab na jā.eñge ġhair ke dar par

kah diyā ek baar kyā kahnā

qabr meñ bhī khulī rahīñ āñkheñ

vaah re intizār kyā kahnā

Dar na tū saath mere chal zāhid

saaqī apnā hai yaar kyā kahnā

pahlī manzil pe thak ke baiTh ga.e

vaa.e bar-jān-e-zār kyā kahnā

na.at-e-ahmad se hai 'qamar' shohrat

aisī shohrat kī yaar kyā kahnā

arsa-e-kā.enāt mauj-e-sarāb

dīda-e-tishna-kār kyā kahnā

ek hī vaar meñ utārā sar

teġh-e-qātil kī dhaar kyā kahnā

mere ḳhvāja hasan nizāmī kā

dil-e-ā.īna-dār kyā kahnā

un tabīboñ se huuñ maiñ be-parvā

shauq-e-dīdār-e-yār kyā kahnā

pūchhtā kyā hai hāl-e-mahjūrī

maiñ huuñ bistar kā taar kyā kahnā

us hinā-basta-pā-e-rangīñ kā

ai dil-e-ḳhūñ-fishār kyā kahnā

shukr ai mausam-e-bahār-e-junūñ

jāma-e-tār-tār kyā kahnā

ham se duurī hai ġhair se qurbat

nahnu-aqrab-nigār kyā kahnā

bulbul-e-bostān-e-ahmad huuñ

naġhma-e-sad-hazār kyā kahnā

haañ madīna hai rashk-e-ḳhuld-e-barīñ

us chaman kī bahār kyā kahnā

dil asīrī se pech-o-tāb meñ hai

gesū-e-pechdār kyā kahnā

dur-e-dandāñ kī garmī-o-tābish

ai dur-e-ābdār kyā kahnā

mujhe saudā hai maiñ pareshāñ huuñ

zulf kā intishār kyā kahnā

fitna-pardāz-o-tafraqa-andāz

falak-e-be-vaqār kyā kahnā

misl-e-parvāna tum pe martā hai

'qamar'-e-jāñ-nisār kyā kahnā

aai hai phir bahaar kya kahna

chashm hain ashk-bar kya kahna

misl-e-simab muztarib kyon hai

ai dil-e-be-qarar kya kahna

ab na jaenge ghair ke dar par

kah diya ek bar kya kahna

qabr mein bhi khuli rahin aankhen

wah re intizar kya kahna

Dar na tu sath mere chal zahid

saqi apna hai yar kya kahna

pahli manzil pe thak ke baiTh gae

wae bar-jaan-e-zar kya kahna

nat-e-ahmad se hai 'qamar' shohrat

aisi shohrat ki yar kya kahna

arsa-e-kaenat mauj-e-sarab

dida-e-tishna-kar kya kahna

ek hi war mein utara sar

tegh-e-qatil ki dhaar kya kahna

mere KHwaja hasan nizami ka

dil-e-aina-dar kya kahna

un tabibon se hun main be-parwa

shauq-e-didar-e-yar kya kahna

puchhta kya hai haal-e-mahjuri

main hun bistar ka tar kya kahna

us hina-basta-pa-e-rangin ka

ai dil-e-KHun-fishaar kya kahna

shukr ai mausam-e-bahaar-e-junun

jama-e-tar-tar kya kahna

hum se duri hai ghair se qurbat

nahnu-aqrab-nigar kya kahna

bulbul-e-bostan-e-ahmad hun

naghma-e-sad-hazar kya kahna

han madina hai rashk-e-KHuld-e-barin

us chaman ki bahaar kya kahna

dil asiri se pech-o-tab mein hai

gesu-e-pechdar kya kahna

dur-e-dandan ki garmi-o-tabish

ai dur-e-abdar kya kahna

mujhe sauda hai main pareshan hun

zulf ka intishaar kya kahna

fitna-pardaz-o-tafraqa-andaz

falak-e-be-waqar kya kahna

misl-e-parwana tum pe marta hai

'qamar'-e-jaan-nisar kya kahna