aai sahar qarib to maine paDhi ghazal

aa.ī sahar qarīb to maiñ ne paḌhī ġhazal

jaane lage sitāroñ ke bajte hue kañval

be-tāb hai junūñ ki ġhazal-ḳhvāniyāñ karūñ

ḳhāmosh hai ḳhirad ki nahīñ baat kā mahal

kaise diye jalā.e ġham-e-rozgār ne

kuchh aur jagmagā.e ġham-e-yār ke mahal

ab tark-e-dostī hī taqāzā hai vaqt kā

ai yār-e-chāra-sāz mirī aag meñ na jal

ai iltifāt-e-yār mujhe sochne to de

marne kā hai maqām yā jiine kā hai mahal

ham rind ḳhāk-o-ḳhūñ meñ aTe haath bhī kaTe

nikle na ai bahār tire gesuoñ ke bal

rāhoñ meñ jū-e-ḳhūñ hai ravāñ misl mauj hai

saaqī yaqīñ na ho to zarā mere saath chal

kuchh bijliyoñ kā shor hai kuchh āndhiyoñ kā zor

dil hai maqām par to zarā baam par nikal

farmān-e-shahryār kī parvā nahīñ mujhe

īmān-e-āshiqāñ ho to 'ābid' paḌhe ġhazal

aai sahar qarib to main ne paDhi ghazal

jaane lage sitaron ke bajte hue kanwal

be-tab hai junun ki ghazal-KHwaniyan karun

KHamosh hai KHirad ki nahin baat ka mahal

kaise diye jalae gham-e-rozgar ne

kuchh aur jagmagae gham-e-yar ke mahal

ab tark-e-dosti hi taqaza hai waqt ka

ai yar-e-chaara-saz meri aag mein na jal

ai iltifat-e-yar mujhe sochne to de

marne ka hai maqam ya jine ka hai mahal

hum rind KHak-o-KHun mein aTe hath bhi kaTe

nikle na ai bahaar tere gesuon ke bal

rahon mein ju-e-KHun hai rawan misl mauj hai

saqi yaqin na ho to zara mere sath chal

kuchh bijliyon ka shor hai kuchh aandhiyon ka zor

dil hai maqam par to zara baam par nikal

farman-e-shahryar ki parwa nahin mujhe

iman-e-ashiqan ho to 'abid' paDhe ghazal