aai udas raat sahar chashm-e-tar gai

aa.ī udaas raat sahar chashm-e-tar ga.ī

vo kyā ga.e ki raunaq-e-shām-o-sahar ga.ī

yuuñ to harīm-e-nāz pe sab kī nazar ga.ī

lekin zamāne bhar kī balā mere sar ga.ī

rishta ḳhushī kā ġham se kabhī TūTtā nahīñ

ġham mere paas hai to ḳhushī us ke ghar ga.ī

mere lahū se rang-e-gulistāñ nikhar gayā

mere junūñ ke faiz se duniyā sañvar ga.ī

maiñ kho gayā huuñ gardish-e-daurāñ meñ is tarah

ye bhī ḳhabar nahīñ ki javānī kidhar ga.ī

hāthoñ se chhūT chhūT gayā dāman-e-ḳhayāl

kāfir nigāh chhoḌ ke aisā asar ga.ī

husn-e-junūñ-navāz kī dildāriyāñ 'nazīr'

jalve machal rahe the jahāñ tak nazar ga.ī

aai udas raat sahar chashm-e-tar gai

wo kya gae ki raunaq-e-sham-o-sahar gai

yun to harim-e-naz pe sab ki nazar gai

lekin zamane bhar ki bala mere sar gai

rishta KHushi ka gham se kabhi TuTta nahin

gham mere pas hai to KHushi us ke ghar gai

mere lahu se rang-e-gulistan nikhar gaya

mere junun ke faiz se duniya sanwar gai

main kho gaya hun gardish-e-dauran mein is tarah

ye bhi KHabar nahin ki jawani kidhar gai

hathon se chhuT chhuT gaya daman-e-KHayal

kafir nigah chhoD ke aisa asar gai

husn-e-junun-nawaz ki dildariyan 'nazir'

jalwe machal rahe the jahan tak nazar gai