aaina ban jaiye jalwa-asar ho jaiye

ā.īna ban jā.iye jalva-asar ho jā.iye

sāmne vo hoñ to sar-tā-pā nazar ho jā.iye

soz-e-dil se gosha-e-tanhā.ī meñ kyā fā.eda

is tarah jaliye charāġh-e-rahguzar ho jā.iye

is udāsī kā dhuñdlakā ḳhatm ho shāyad kabhī

shaam se pahle hī unvān-e-sahar ho jā.iye

manzil-e-ulfat pe dil tanhā pahuñch saktā nahīñ

aap agar chāheñ to mere ham-safar ho jā.iye

ḳhud-baḳhud saare zamāne ko ḳhabar ho jā.egī

hoshiyārī hai ki sab se be-ḳhabar ho jā.iye

shauq kahtā hai ki sajdoñ meñ tasalsul chāhiye

dil ye kahtā hai ki jazb-e-sañg-e-dar ho jā.iye

jab kisī se pesh-qadmī zulm kī ruktī na ho

us jagah lāzim hai ḳhud sīna-sipar ho jā.iye

ik azāb-e-mustaqil hai fikr-e-ta.amīr-e-makāñ

sākin-e-sahrā-e-be-dīvār-o-dar ho jā.iye

kashmakash meñ infirādiyyat zarūrī hai 'sabā'

jis taraf koī nahīñ hotā udhar ho jā.iye

aaina ban jaiye jalwa-asar ho jaiye

samne wo hon to sar-ta-pa nazar ho jaiye

soz-e-dil se gosha-e-tanhai mein kya faeda

is tarah jaliye charagh-e-rahguzar ho jaiye

is udasi ka dhundlaka KHatm ho shayad kabhi

sham se pahle hi unwan-e-sahar ho jaiye

manzil-e-ulfat pe dil tanha pahunch sakta nahin

aap agar chahen to mere ham-safar ho jaiye

KHud-baKHud sare zamane ko KHabar ho jaegi

hoshiyari hai ki sab se be-KHabar ho jaiye

shauq kahta hai ki sajdon mein tasalsul chahiye

dil ye kahta hai ki jazb-e-sang-e-dar ho jaiye

jab kisi se pesh-qadmi zulm ki rukti na ho

us jagah lazim hai KHud sina-sipar ho jaiye

ek azab-e-mustaqil hai fikr-e-tamir-e-makan

sakin-e-sahra-e-be-diwar-o-dar ho jaiye

kashmakash mein infiradiyyat zaruri hai 'saba'

jis taraf koi nahin hota udhar ho jaiye