aaina dekhte hi wo diwana ho gaya

ā.īna dekhte hī vo dīvāna ho gayā

dekhā kise ki sham.a se parvāna ho gayā

gul kar ke sham.a so.e the ham nā-murād aaj

raushan kisī ke aane se kāshāna ho gayā

dīvāna qais pahle hameñ chheḌtā rahā

phir rafta rafta najd meñ yārāna ho gayā

kaafī na mohr-e-ḳhum ko hue lukkā-hā-e-abr

ab is qadar vasī.a ye ḳhum-ḳhāna ho gayā

hāsil ba-iḳhtisās hai us dil ko ye sharaf

ka.aba banā kabhī kabhī but-ḳhāna ho gayā

laa.e churā ke bahar-e-parastish butoñ ko ghar

vīrān chaar roz meñ but-ḳhāna ho gayā

muñh chuum luuñ ye kis ne kahā mujh ko dekh kar

dīvāna thā hī aur bhī dīvāna ho gayā

toḌī thī jis se tauba kisī ne hazār baar

afsos nazr-e-tauba vo paimāna ho gayā

mai tauba ban ke aa.ī thī lab tak ki ai 'riyāz'

labrez apnī umr kā paimāna ho gayā

aaina dekhte hi wo diwana ho gaya

dekha kise ki shama se parwana ho gaya

gul kar ke shama soe the hum na-murad aaj

raushan kisi ke aane se kashana ho gaya

diwana qais pahle hamein chheDta raha

phir rafta rafta najd mein yarana ho gaya

kafi na mohr-e-KHum ko hue lukka-ha-e-abr

ab is qadar wasia ye KHum-KHana ho gaya

hasil ba-iKHtisas hai us dil ko ye sharaf

kaba bana kabhi kabhi but-KHana ho gaya

lae chura ke bahar-e-parastish buton ko ghar

viran chaar roz mein but-KHana ho gaya

munh chum lun ye kis ne kaha mujh ko dekh kar

diwana tha hi aur bhi diwana ho gaya

toDi thi jis se tauba kisi ne hazar bar

afsos nazr-e-tauba wo paimana ho gaya

mai tauba ban ke aai thi lab tak ki ai 'riyaz'

labrez apni umr ka paimana ho gaya