aaina-e-dil dagh-e-tamanna ke liye tha

ā.īna-e-dil dāġh-e-tamannā ke liye thā

siine kā sadaf ik dur-e-yaktā ke liye thā

jo tairne vaale the vo mañjdhār se guzre

dariyā kā kināra kaf-e-dariyā ke liye thā

kyuuñ haath meñ tere mujhe patthar nazar aayā

dīvāna agar thā to maiñ duniyā ke liye thā

guzrā na tire baa'd koī kūcha-e-dil se

ye rāsta ik naqsh-e-kaf-e-pā ke liye thā

dīvār se ruktā nahīñ dīvār kā saaya

zabt-e-ġham-e-māzī ġham-e-fardā ke liye thā

koī nahīñ mahfūz yahāñ dast-e-havas se

yūsuf kā jo dāman thā zuleḳhā ke liye thā

be-parda chamaktā hai jo ab mahfil-e-shab meñ

vo chāñd 'samad' kal yad-e-baizā ke liye thā

aaina-e-dil dagh-e-tamanna ke liye tha

sine ka sadaf ek dur-e-yakta ke liye tha

jo tairne wale the wo manjdhaar se guzre

dariya ka kinara kaf-e-dariya ke liye tha

kyun hath mein tere mujhe patthar nazar aaya

diwana agar tha to main duniya ke liye tha

guzra na tere ba'd koi kucha-e-dil se

ye rasta ek naqsh-e-kaf-e-pa ke liye tha

diwar se rukta nahin diwar ka saya

zabt-e-gham-e-mazi gham-e-farda ke liye tha

koi nahin mahfuz yahan dast-e-hawas se

yusuf ka jo daman tha zuleKHa ke liye tha

be-parda chamakta hai jo ab mahfil-e-shab mein

wo chand 'samad' kal yad-e-baiza ke liye tha