aaina-e-KHayal mein KHwabon ke silsile

ā.īna-e-ḳhayāl meñ ḳhvāboñ ke silsile

dariyā meñ maujzan haiñ sarāboñ ke silsile

mahke haiñ dil meñ yuuñ tirī yādoñ ke zaḳhm bhī

jaise khile hoñ taaza gulāboñ ke silsile

phūloñ kī anjuman meñ sitāroñ kī chhāñv meñ

bikhre kahāñ kahāñ mire ḳhvāboñ ke silsile

har shaḳhs hai ḳhud apne ḳhayālāt kā rasūl

chehre bhī haiñ ḳhudā kī kitāboñ ke silsile

ham bhī phire haiñ dasht-e-tamannā meñ sar-ba-kaf

milte haiñ ham se ḳhāna-ḳharāboñ ke silsile

ham haiñ savāl-e-‘arz-e-tamanna kī bāzgasht

ham par hue haiñ ḳhatm javāboñ ke silsile

jaltā huuñ zindagī ke jahannum meñ rāt-din

jaarī haiñ har nafas pe 'azāboñ ke silsile

apnī haqīqatoñ ko chhupā.e hue haiñ log

chehre haiñ yā hasīn naqāboñ ke silsile

ai 'badr' zaḳhm-e-dil haiñ ġham-e-dil pe ḳhanda-zan

dariyā se khelte haiñ habāboñ ke silsile

aaina-e-KHayal mein KHwabon ke silsile

dariya mein maujzan hain sarabon ke silsile

mahke hain dil mein yun teri yaadon ke zaKHm bhi

jaise khile hon taza gulabon ke silsile

phulon ki anjuman mein sitaron ki chhanw mein

bikhre kahan kahan mere KHwabon ke silsile

har shaKHs hai KHud apne KHayalat ka rasul

chehre bhi hain KHuda ki kitabon ke silsile

hum bhi phire hain dasht-e-tamanna mein sar-ba-kaf

milte hain hum se KHana-KHarabon ke silsile

hum hain sawal-e-‘arz-e-tamanna ki bazgasht

hum par hue hain KHatm jawabon ke silsile

jalta hun zindagi ke jahannum mein raat-din

jari hain har nafas pe 'azabon ke silsile

apni haqiqaton ko chhupae hue hain log

chehre hain ya hasin naqabon ke silsile

ai 'badr' zaKHm-e-dil hain gham-e-dil pe KHanda-zan

dariya se khelte hain hababon ke silsile