aaina pyar ka ek aks tera mange hai

aa.ina pyaar kā ik aks tirā māñge hai

dil bhare shahr meñ bas terī sadā māñge hai

jism ḳhud-sar hai ki har dard sahe jaatā hai

aisā ziddī hai ki jiine kī sazā māñge hai

raat Dhal jaa.e to hāthoñ kī lakīreñ jāgeñ

be-sukūñ zehn hamesha ye duā māñge hai

ḳhush badan ho to zarā ḳhud ko bachā kar rakkho

mausam-e-zard koī peḌ harā māñge hai

maiñ hī ḳhud ko kisī maqtal meñ sajā kar rakh duuñ

tez āñdhī koī nanhā sā diyā māñge hai

kaun hai jo ki sarāboñ se ulajhnā chāhe

kaun hai jo ki mire ghar kā pata māñge hai

parvarish jis meñ gul-e-tāza kī hotī hai 'niyāz'

pyaar kā phuul vahī āb-o-havā māñge hai

aaina pyar ka ek aks tera mange hai

dil bhare shahr mein bas teri sada mange hai

jism KHud-sar hai ki har dard sahe jata hai

aisa ziddi hai ki jine ki saza mange hai

raat Dhal jae to hathon ki lakiren jagen

be-sukun zehn hamesha ye dua mange hai

KHush badan ho to zara KHud ko bacha kar rakkho

mausam-e-zard koi peD hara mange hai

main hi KHud ko kisi maqtal mein saja kar rakh dun

tez aandhi koi nanha sa diya mange hai

kaun hai jo ki sarabon se ulajhna chahe

kaun hai jo ki mere ghar ka pata mange hai

parwarish jis mein gul-e-taza ki hoti hai 'niyaz'

pyar ka phul wahi aab-o-hawa mange hai