aaine ke aks se gul sa badan maila hua

ā.īne ke aks se gul sā badan mailā huā

sub.h ke partav se rañg-e-yāsman mailā huā

saaf ai uryānī-e-vahshat kahe detā huuñ maiñ

post khīñchūñgā agar merā badan mailā huā

ba.ad murdan bhī takalluf se kudūrat dil meñ hai

sohbat-e-kāfūr se apnā badan mailā huā

kyā tirī talvār bhī mujh se ġhubār-ālūd thī

ḳhūn-e-dil kā rañg kyuuñ ai teġh-zan mailā huā

shā.eroñ meñ guftugū aa.ī kudūrat kī baham

saaf kahtā huuñ ki ab rañg-e-suḳhan mailā huā

vasl kī shab bātoñ bātoñ meñ mukaddar ho ga.ī

guftugū-e-bosa se rañg-e-dahan mailā huā

sāf-goī se ġhubār ā.īne meñ aayā 'munīr'

merī bātoñ se dil-e-ahl-e-suḳhan mailā huā

aaine ke aks se gul sa badan maila hua

subh ke partaw se rang-e-yasman maila hua

saf ai uryani-e-wahshat kahe deta hun main

post khinchunga agar mera badan maila hua

baad murdan bhi takalluf se kudurat dil mein hai

sohbat-e-kafur se apna badan maila hua

kya teri talwar bhi mujh se ghubar-alud thi

KHun-e-dil ka rang kyun ai tegh-zan maila hua

shaeron mein guftugu aai kudurat ki baham

saf kahta hun ki ab rang-e-suKHan maila hua

wasl ki shab baaton baaton mein mukaddar ho gai

guftugu-e-bosa se rang-e-dahan maila hua

saf-goi se ghubar aaine mein aaya 'munir'

meri baaton se dil-e-ahl-e-suKHan maila hua