aaine se tumhaari nazar der se mili

ā.īne se tumhārī nazar der se milī

mujh ko naved-e-shām-o-sahar der se milī

dariyā-e-be-ḳhudī ko bhañvar der se milā

paanī ko sāhiloñ kī ḳhabar der se milī

shāyad isī liye mujhe manzil na mil sakī

mujh ko tumhārī rāhguzar der se milī

be-ḳhvāb rāstoñ meñ ye ta.abīr-e-dard-e-dil

mil to ga.ī hai mujh ko magar der se milī

un ko na mil sakī tire ujle badan kī dhuup

jin ko ziyā-e-shams-o-qamar der se milī

aaine se tumhaari nazar der se mili

mujh ko nawed-e-sham-o-sahar der se mili

dariya-e-be-KHudi ko bhanwar der se mila

pani ko sahilon ki KHabar der se mili

shayad isi liye mujhe manzil na mil saki

mujh ko tumhaari rahguzar der se mili

be-KHwab raston mein ye tabir-e-dard-e-dil

mil to gai hai mujh ko magar der se mili

un ko na mil saki tere ujle badan ki dhup

jin ko ziya-e-shams-o-qamar der se mili