aaina ahd-e-guzashta ka bacha rah gaya hai

aa.ina ahd-e-guzashta kā bachā rah gayā hai

tāq-e-nisyāñ pe abhī ek diyā rah gayā hai

khiḌkiyāñ so ga.iiñ ḳhāmosh hue saare charāġh

ik darīcha magar is ghar kā khulā rah gayā hai

ai havā ab to na kar aag ugalne kā amal

shāḳh par bas yahī ik pattā harā rah gayā hai

kahīñ Thokar se koī zaḳhm na aa jaa.e tujhe

dil hamārā tire qadmoñ meñ paḌā rah gayā hai

ab hai dariyā meñ koī shor na halchal koī

ho ke ḳhāmosh mirā sang-e-navā rah gayā hai

kis liye aa.ī hai tū ujḌe hue gulshan meñ

ab bhī kuchh kahne ko kyā bād-e-sabā rah gayā hai

zikr aa jaatā hai rasman sar-e-mahfil aksar

ab tirā naam faqat ḳhauf-e-ḳhudā rah gayā hai

aisā lagtā hai ki kuchh moḌ haiñ baaqī ġham ke

uThte uThte jo mirā dast-e-duā rah gayā hai

ai havā rāsta de us ko nikalne ke liye

bujh ga.ī aag dhuāñ ghar meñ bharā rah gayā hai

kis liye zid kiye hai chhoḌ ke jaane kī mujhe

ḳhāmushī tere sivā paas meñ kyā rah gayā hai

us ke chehre pe chamak hai na koī rang 'mujīb'

haañ hathelī pe magar rang-e-hinā rah gayā hai

aaina ahd-e-guzashta ka bacha rah gaya hai

taq-e-nisyan pe abhi ek diya rah gaya hai

khiDkiyan so gain KHamosh hue sare charagh

ek daricha magar is ghar ka khula rah gaya hai

ai hawa ab to na kar aag ugalne ka amal

shaKH par bas yahi ek patta hara rah gaya hai

kahin Thokar se koi zaKHm na aa jae tujhe

dil hamara tere qadmon mein paDa rah gaya hai

ab hai dariya mein koi shor na halchal koi

ho ke KHamosh mera sang-e-nawa rah gaya hai

kis liye aai hai tu ujDe hue gulshan mein

ab bhi kuchh kahne ko kya baad-e-saba rah gaya hai

zikr aa jata hai rasman sar-e-mahfil aksar

ab tera nam faqat KHauf-e-KHuda rah gaya hai

aisa lagta hai ki kuchh moD hain baqi gham ke

uThte uThte jo mera dast-e-dua rah gaya hai

ai hawa rasta de us ko nikalne ke liye

bujh gai aag dhuan ghar mein bhara rah gaya hai

kis liye zid kiye hai chhoD ke jaane ki mujhe

KHamushi tere siwa pas mein kya rah gaya hai

us ke chehre pe chamak hai na koi rang 'mujib'

han hatheli pe magar rang-e-hina rah gaya hai