aaina apne dil ka saf kiya

aa.ina apne dil kā saaf kiyā

jā tujhe maiñ ne ab mu'āf kiyā

terī bātoñ kā e'tirāf kiyā

tū ne mujh se hī iḳhtilāf kiyā

shab-e-furqat thī sard so ham ne

vasl ke ḳhvāb ko lihāf kiyā

chāñd kartā hai jyuuñ zamīñ kā tavāf

tere kūche kā yuuñ tavāf kiyā

'ishq se ham ne āshnā.ī kī

tū ne bas 'ain shiin qaaf kiyā

ik parī-rū ne dil meñ ho ke makīñ

dil mirā jaise koh-e-qāf kiyā

karnī thī jo namāz-e-'ishq adā

ham ne sahrā meñ ai'takāf kiyā

ye sukūñ ehtijāj karne lagā

faisla dil ke kyoñ ḳhilāf kiyā

nā-umīdī kī tīrgī meñ 'anīs'

ek ummīd ne shigāf kiyā

aaina apne dil ka saf kiya

ja tujhe main ne ab mu'af kiya

teri baaton ka e'tiraf kiya

tu ne mujh se hi iKHtilaf kiya

shab-e-furqat thi sard so hum ne

wasl ke KHwab ko lihaf kiya

chand karta hai jyun zamin ka tawaf

tere kuche ka yun tawaf kiya

'ishq se hum ne aashnai ki

tu ne bas 'ain shin qaf kiya

ek pari-ru ne dil mein ho ke makin

dil mera jaise koh-e-qaf kiya

karni thi jo namaz-e-'ishq ada

hum ne sahra mein ai'takaf kiya

ye sukun ehtijaj karne laga

faisla dil ke kyon KHilaf kiya

na-umidi ki tirgi mein 'anis'

ek ummid ne shigaf kiya