aaina dekhna angusht ba-dandan rahna

aa.ina dekhnā añgusht ba-dandāñ rahnā

us ne to ham ko bhī sikhlā diyā hairāñ rahnā

Dagmagā jaa.eñ qadam rāh-e-talab meñ kis vaqt

tū mire saath mire shauq gurezāñ rahnā

dil-e-nāzuk ko lagānā thā Thikāne yā-rab

is ke bas kā nahīñ nazdīk-e-rag-e-jāñ rahnā

jo huā tuur pe is meñ nahīñ hairat koī

ibn-e-ādam kī to taqdīr hai hairāñ rahnā

tere me.aar pe ai zindagī rahnā hai kaThin

siikh le tū hī mirī shaan ke shāyāñ rahnā

maiñ to kar guzrūñgā jo dil meñ mire aa.egī

mujh ko manzūr nahīñ apnā nigahbāñ rahnā

us kī nazroñ meñ kahīñ ye bhī ibādat hī na ho

umr bhar ḳhud se mirā dast-o-garebāñ rahnā

daur-e-hāzir kī badaltī huī in qadroñ meñ

kitnā dushvār hai insān kā insāñ rahnā

aaina dekhna angusht ba-dandan rahna

us ne to hum ko bhi sikhla diya hairan rahna

Dagmaga jaen qadam rah-e-talab mein kis waqt

tu mere sath mere shauq gurezan rahna

dil-e-nazuk ko lagana tha Thikane ya-rab

is ke bas ka nahin nazdik-e-rag-e-jaan rahna

jo hua tur pe is mein nahin hairat koi

ibn-e-adam ki to taqdir hai hairan rahna

tere mear pe ai zindagi rahna hai kaThin

sikh le tu hi meri shan ke shayan rahna

main to kar guzrunga jo dil mein mere aaegi

mujh ko manzur nahin apna nigahban rahna

us ki nazron mein kahin ye bhi ibaadat hi na ho

umr bhar KHud se mera dast-o-gareban rahna

daur-e-hazir ki badalti hui in qadron mein

kitna dushwar hai insan ka insan rahna