aaina hai KHayal ki hairat

aa.ina hai ḳhayāl kī hairat

us pe tere jamāl kī hairat

koī chehra nahīñ tamannā kā

kuchh nahīñ ḳhadd-o-ḳhāl kī hairat

kaun sā sharq kis tarah kā ġharb

kyā junūb-o-shumāl kī hairat

aisā kartā huuñ bāñdh detā huuñ

zaḳhm par indimāl kī hairat

dekhne vaalā bhī pareshāñ hai

TuuTe shīshe meñ baal kī hairat

dil pe chaltā hai dard kā jaadū

aañkh meñ hai malāl kī hairat

de gayā hai javāb aa kar vo

rah ga.ī hai savāl kī hairat

sab ko hairat meñ Daal detī hai

chaal par khaa.ī chaal kī hairat

khīñch letī hai ek din ḳhud hī

jal-parī ko bhī jaal kī hairat

tohfa miltā hai jab janam-din pe

ḳhatm hotī hai saal kī hairat

tabsire the uruuj par mere

maiñ ne dekhī zavāl kī hairat

sab ayaañ ho gayā zamāne par

ḳhatm-shud māh-o-sāl kī hairat

apnā maazī batā rahā hai 'zeb'

lauT aa.egī haal kī hairat

aaina hai KHayal ki hairat

us pe tere jamal ki hairat

koi chehra nahin tamanna ka

kuchh nahin KHadd-o-KHal ki hairat

kaun sa sharq kis tarah ka gharb

kya junub-o-shumal ki hairat

aisa karta hun bandh deta hun

zaKHm par indimal ki hairat

dekhne wala bhi pareshan hai

TuTe shishe mein baal ki hairat

dil pe chalta hai dard ka jadu

aankh mein hai malal ki hairat

de gaya hai jawab aa kar wo

rah gai hai sawal ki hairat

sab ko hairat mein Dal deti hai

chaal par khai chaal ki hairat

khinch leti hai ek din KHud hi

jal-pari ko bhi jal ki hairat

tohfa milta hai jab janam-din pe

KHatm hoti hai sal ki hairat

tabsire the uruj par mere

main ne dekhi zawal ki hairat

sab ayan ho gaya zamane par

KHatm-shud mah-o-sal ki hairat

apna mazi bata raha hai 'zeb'

lauT aaegi haal ki hairat