aaina hun ek hairani mere chaaron taraf

aa.ina huuñ ek hairānī mire chāroñ taraf

lamha lamha hashr-sāmānī mire chāroñ taraf

bahr-e-isyāñ meñ ghirā nanhe jazīre sā vo maiñ

aur phir hadd-e-nazar paanī mire chāroñ taraf

jurm hai ma.asūmiyat ma.atūb hai dīvāngī

hai ḳhirad-mandoñ kī nādānī mire chāroñ taraf

vaqfe vaqfe se yahāñ uThne lage haiñ gard-bād

har taraf māhaul tūfānī mire chāroñ taraf

bastiyāñ jitnī bhī thiiñ shahr-e-ḳhamoshāñ ho ga.iiñ

ho ga.ī ābād vīrānī mire chāroñ taraf

maiñ ki huuñ har haal meñ chashm-e-tavajjoh kā shikār

hai taġhāful kī nigahbānī mire chāroñ taraf

kaun hai jabr-o-sazā kā mustahiq mere sivā

hai jo bad-ḳhvāhoñ kī sultānī mire chāroñ taraf

aaina hun ek hairani mere chaaron taraf

lamha lamha hashr-samani mere chaaron taraf

bahr-e-isyan mein ghira nanhe jazire sa wo main

aur phir hadd-e-nazar pani mere chaaron taraf

jurm hai masumiyat matub hai diwangi

hai KHirad-mandon ki nadani mere chaaron taraf

waqfe waqfe se yahan uThne lage hain gard-baad

har taraf mahaul tufani mere chaaron taraf

bastiyan jitni bhi thin shahr-e-KHamoshan ho gain

ho gai aabaad virani mere chaaron taraf

main ki hun har haal mein chashm-e-tawajjoh ka shikar

hai taghaful ki nigahbani mere chaaron taraf

kaun hai jabr-o-saza ka mustahiq mere siwa

hai jo bad-KHwahon ki sultani mere chaaron taraf