آئنہ مخاطب ہے آؤ گفتگو کر لیں

آئنہ مخاطب ہے آؤ گفتگو کر لیں

اور اسی بہانے ہم خود کی جستجو کر لیں

جانے پھر جمے کس دن بزم دل فگاروں کی

آؤ چند ساعت ہم کیوں نہ ہاؤ ہو کر لیں

ہونٹ یک بہ یک رکھ دیں ہم کف حنائی پر

اس کو سرخ رو کر دیں خود کو سرخ رو کر لیں

یہ بھی ایک لمحہ ہے آمد بہاراں کا

پھاڑ لیں گریباں کو جشن رنگ و بو کر لیں

آبلوں کے پانی سے ذرے ذرے کو سینچیں

دشت آتشیں کو بھی شامل نمو کر لیں

کیوں نہ عام ہو چرچا اس کی مہربانی کا

ہم بھی اس کی آنکھوں کا ذکر کو بہ کو کر لیں

رشتۂ نفس ٹوٹے جانے کس گھڑی ساحلؔ

کیوں نہ اپنی ہستی کو وقف آرزو کر لیں