aaina muKHatab hai aao guftugu kar len

aa.ina muḳhātab hai aao guftugū kar leñ

aur isī bahāne ham ḳhud kī justujū kar leñ

jaane phir jame kis din bazm dil-figāroñ kī

aao chand saa.at ham kyoñ na hāo-hū kar leñ

hoñT yak-ba-yak rakh deñ ham kaf-e-hinā.ī par

us ko surḳh-rū kar deñ ḳhud ko surḳh-rū kar leñ

ye bhī ek lamha hai āmad-e-bahārāñ kā

phaaḌ leñ garebāñ ko jashn-e-rang-o-bū kar leñ

ābloñ ke paanī se zarre-zarre ko sīñcheñ

dasht-e-ātishīñ ko bhī shāmil-e-numū kar leñ

kyoñ na aam ho charchā us kī mehrbānī kā

ham bhī us kī āñkhoñ kā zikr kū-ba-kū kar leñ

rishta-e-nafas TuuTe jaane kis ghaḌī 'sāhil'

kyoñ na apnī hastī ko vaqf-e-ārzū kar leñ

aaina muKHatab hai aao guftugu kar len

aur isi bahane hum KHud ki justuju kar len

jaane phir jame kis din bazm dil-figaron ki

aao chand saat hum kyon na hao-hu kar len

honT yak-ba-yak rakh den hum kaf-e-hinai par

us ko surKH-ru kar den KHud ko surKH-ru kar len

ye bhi ek lamha hai aamad-e-bahaaran ka

phaD len gareban ko jashn-e-rang-o-bu kar len

aablon ke pani se zarre-zarre ko sinchen

dasht-e-atishin ko bhi shamil-e-numu kar len

kyon na aam ho charcha us ki mehrbani ka

hum bhi us ki aankhon ka zikr ku-ba-ku kar len

rishta-e-nafas TuTe jaane kis ghaDi 'sahil'

kyon na apni hasti ko waqf-e-arzu kar len