aaine ke ru-ba-ru ek aaina rakhta hun main

aa.ine ke rū-ba-rū ik aa.ina rakhtā huuñ maiñ

rāt-din hairat meñ ḳhud ko mubtalā rakhtā huuñ maiñ

dostoñ vaalī bhī ik ḳhūbī hai un meñ is liye

dushmanoñ se bhī musalsal rābta rakhtā huuñ maiñ

roz-o-shab maiñ ghūmtā huuñ vaqt kī pur-kār par

apne chāroñ samt koī dā.era rakhtā huuñ maiñ

khaTkhaTāne kī bhī zahmat koī āḳhir kyuuñ kare

is liye bhī ghar kā darvāza khulā rakhtā huuñ maiñ

āj-kal ḳhud se bhī hai ranjish kā koī silsila

āj-kal ḳhud se bhī thoḌā fāsla rakhtā huuñ maiñ

chand yādeñ ek chehra ek ḳhvāhish ek ḳhvāb

apne dil meñ aur kyā un ke sivā rakhtā huuñ maiñ

chand tasvīreñ kitābeñ ḳhushbueñ aur ek phuul

apnī almārī meñ 'tābish' aur kyā rakhtā huuñ maiñ

aaine ke ru-ba-ru ek aaina rakhta hun main

raat-din hairat mein KHud ko mubtala rakhta hun main

doston wali bhi ek KHubi hai un mein is liye

dushmanon se bhi musalsal rabta rakhta hun main

roz-o-shab main ghumta hun waqt ki pur-kar par

apne chaaron samt koi daera rakhta hun main

khaTkhaTane ki bhi zahmat koi aaKHir kyun kare

is liye bhi ghar ka darwaza khula rakhta hun main

aaj-kal KHud se bhi hai ranjish ka koi silsila

aaj-kal KHud se bhi thoDa fasla rakhta hun main

chand yaaden ek chehra ek KHwahish ek KHwab

apne dil mein aur kya un ke siwa rakhta hun main

chand taswiren kitaben KHushbuen aur ek phul

apni almari mein 'tabish' aur kya rakhta hun main