aaine se baat karna itna aasan bhi nahin

aa.ine se baat karnā itnā āsāñ bhī nahīñ

aks kī tah se ubharnā itnā āsāñ bhī nahīñ

ḳhvāhisheñ siine meñ ug aatī haiñ jañgal kī tarah

zindagī bāñhoñ meñ bharnā itnā āsāñ bhī nahīñ

apne hī qadmoñ kī aahaT jis jagah chubhne lage

aisī rāhoñ se guzarnā itnā āsāñ bhī nahīñ

jāntī huuñ maiñ judā hai mere ḳhvāboñ kā mizāj

in ujāloñ meñ sañvarnā itnā āsāñ bhī nahīñ

saath rahtā hai hamesha terā ġham terā ḳhayāl

ab huā mālūm marnā itnā āsāñ bhī nahīñ

kaisī kaisī ūñchī dīvāreñ khaḌī haiñ har taraf

dil meñ jo hai kar guzarnā itnā āsāñ bhī nahīñ

rakh diyā hai aap kī chāhat ne mujh ko jis jagah

is bulandī se utarnā itnā āsāñ bhī nahīñ

sochnā paḌtā hai tanhā.ī meñ ḳhud ko bārhā

apne hī sach se mukarnā itnā āsāñ bhī nahīñ

jaane 'ūshā' kitne bandhan kitne rishte toḌ kar

dil kī ḳhālī god bharnā itnā āsāñ bhī nahīñ

aaine se baat karna itna aasan bhi nahin

aks ki tah se ubharna itna aasan bhi nahin

KHwahishen sine mein ug aati hain jangal ki tarah

zindagi banhon mein bharna itna aasan bhi nahin

apne hi qadmon ki aahaT jis jagah chubhne lage

aisi rahon se guzarna itna aasan bhi nahin

jaanti hun main juda hai mere KHwabon ka mizaj

in ujalon mein sanwarna itna aasan bhi nahin

sath rahta hai hamesha tera gham tera KHayal

ab hua malum marna itna aasan bhi nahin

kaisi kaisi unchi diwaren khaDi hain har taraf

dil mein jo hai kar guzarna itna aasan bhi nahin

rakh diya hai aap ki chahat ne mujh ko jis jagah

is bulandi se utarna itna aasan bhi nahin

sochna paDta hai tanhai mein KHud ko barha

apne hi sach se mukarna itna aasan bhi nahin

jaane 'usha' kitne bandhan kitne rishte toD kar

dil ki KHali god bharna itna aasan bhi nahin