aaiye dahr mein insan ka chehra DhunDen

aa.iye dahr meñ insān kā chehra DhūñDeñ

be-yaqīnī meñ bhī imkān kā chehra DhūñDeñ

ahl-e-fan dāman-e-iḳhlās talab karte haiñ

shahr kī bhiiḌ meñ pahchān kā chehra DhūñDeñ

adl par apne sarāboñ kā asar haavī hai

dostoñ aao ki mīzān kā chehra DhūñDeñ

bhuuk se log taḌapte haiñ gharoñ meñ apne

ahl-e-sarvat meñ ham ehsān kā chehra DhūñDeñ

khet meñ fasl-e-sahar pakne lagī hai phir se

ham har ik daane pe dahqān kā chehra DhūñDeñ

haiñ hujūm-e-ġham-e-daurāñ se pareshān to kyā

apne aslāf ke aivān kā chehra DhūñDeñ

yās-o-hasrat kī riyāsat meñ nahīñ ham tanhā

qarya qarya chalo haijān kā chehra DhūñDeñ

aaiye dahr mein insan ka chehra DhunDen

be-yaqini mein bhi imkan ka chehra DhunDen

ahl-e-fan daman-e-iKHlas talab karte hain

shahr ki bhiD mein pahchan ka chehra DhunDen

adl par apne sarabon ka asar hawi hai

doston aao ki mizan ka chehra DhunDen

bhuk se log taDapte hain gharon mein apne

ahl-e-sarwat mein hum ehsan ka chehra DhunDen

khet mein fasl-e-sahar pakne lagi hai phir se

hum har ek dane pe dahqan ka chehra DhunDen

hain hujum-e-gham-e-dauran se pareshan to kya

apne aslaf ke aiwan ka chehra DhunDen

yas-o-hasrat ki riyasat mein nahin hum tanha

qarya qarya chalo haijaan ka chehra DhunDen