آج آئینہ جو دیکھا کتنی حیرانی ہوئی

آج آئینہ جو دیکھا کتنی حیرانی ہوئی

اجنبی آئی نظر اک شکل پہچانی ہوئی

جب یہ جانا وقت مشکل کوئی بھی ساتھی نہیں

دل کو راحت سی ملی محسوس آسانی ہوئی

ہم سمجھتے تھے کہ بے گھر بے سہارا ہیں مگر

آسماں نے ایک چادر ہم پہ تھی تانی ہوئی

آنسوؤں پہ ہنسنے والو کیا تمہیں معلوم ہے

آگ جو دل میں تھی آ کر آنکھ میں پانی ہوئی

ساتھ لے کر خوشیاں اپنے زندگی پھر آ گئی

ہم نے اپنے دل میں تھی کچھ اور ہی ٹھانی ہوئی

ہم بھی اس لمحے سے خائف تھے بہت خائف اے دوست

ہم سے مل کر تم کو بھی یکسر پریشانی ہوئی

راستے کی مشکلیں تاثیرؔ کیا پر لطف تھیں

ہاں مگر منزل پر آ کر کچھ پریشانی ہوئی