aaj aaina jo dekha kitni hairani hui

aaj ā.īna jo dekhā kitnī hairānī huī

ajnabī aa.ī nazar ik shakl pahchānī huī

jab ye jaanā vaqt-e-mushkil koī bhī sāthī nahīñ

dil ko rāhat sī milī mahsūs āsānī huī

ham samajhte the ki be-ghar be-sahārā haiñ magar

āsmāñ ne ek chādar ham pe thī taanī huī

āñsūoñ pe hañsne vaalo kyā tumheñ mālūm hai

aag jo dil meñ thī aa kar aañkh meñ paanī huī

saath le kar ḳhushiyāñ apne zindagī phir aa ga.ī

ham ne apne dil meñ thī kuchh aur hī Thānī huī

ham bhī is lamhe se ḳhā.if the bahut ḳhā.if ai dost

ham se mil kar tum ko bhī yaksar pareshānī huī

rāste kī mushkileñ 'tāsīr' kyā pur-lutf thiiñ

haañ magar manzil par aa kar kuchh pareshānī huī

aaj aaina jo dekha kitni hairani hui

ajnabi aai nazar ek shakl pahchani hui

jab ye jaana waqt-e-mushkil koi bhi sathi nahin

dil ko rahat si mili mahsus aasani hui

hum samajhte the ki be-ghar be-sahaara hain magar

aasman ne ek chadar hum pe thi tani hui

aansuon pe hansne walo kya tumhein malum hai

aag jo dil mein thi aa kar aankh mein pani hui

sath le kar KHushiyan apne zindagi phir aa gai

hum ne apne dil mein thi kuchh aur hi Thani hui

hum bhi is lamhe se KHaif the bahut KHaif ai dost

hum se mil kar tum ko bhi yaksar pareshani hui

raste ki mushkilen 'tasir' kya pur-lutf thin

han magar manzil par aa kar kuchh pareshani hui