aaj aaraish-e-gesu-e-dota hoti hai

aaj ārā.ish-e-gesū-e-dotā hotī hai

phir mirī jaan giraftār-e-balā hotī hai

shauq-e-pā-bosī-e-jānāñ mujhe baaqī hai hanūz

ghaas jo ugtī hai turbat pe hinā hotī hai

phir kisī kaam kā baaqī nahīñ rahtā insāñ

sach to ye hai ki mohabbat bhī balā hotī hai

jo zamīñ kūcha-e-qātil meñ nikaltī hai na.ī

vaqf vo bahr-e-mazār-e-shohadā hotī hai

jis ne dekhī ho vo chitvan koī us se pūchhe

jaan kyūñ-kar hadaf-e-tīr-e-qazā hotī hai

naza.a kā vaqt burā vaqt hai ḳhāliq kī panāh

hai vo saa.at ki qayāmat se sivā hotī hai

ruuh to ek taraf hotī hai ruḳhsat tan se

aarzū ek taraf dil se judā hotī hai

ḳhud samajhtā huuñ ki rone se bhalā kyā hāsil

par karūñ kyā yūñhī taskīn zarā hotī hai

rauñdte phirte haiñ vo majma-e-aġhyār ke saath

ḳhuub tauqīr-e-mazār-e-shohadā hotī hai

murġh-e-bismil kī tarah loT gayā dil merā

nigah-e-nāz kī tāsīr bhī kyā hotī hai

naala kar lene deñ lillāh na chheḌeñ ahbāb

zabt kartā huuñ to taklīf sivā hotī hai

jism to ḳhaak meñ mil jaate hue dekhte haiñ

ruuh kyā jaane kidhar jaatī hai kyā hotī hai

huuñ fareb-e-sitam-e-yār kā qaa.il 'akbar'

marte marte na khulā ye ki jafā hotī hai

aaj aaraish-e-gesu-e-dota hoti hai

phir meri jaan giraftar-e-bala hoti hai

shauq-e-pa-bosi-e-jaanan mujhe baqi hai hanuz

ghas jo ugti hai turbat pe hina hoti hai

phir kisi kaam ka baqi nahin rahta insan

sach to ye hai ki mohabbat bhi bala hoti hai

jo zamin kucha-e-qatil mein nikalti hai nai

waqf wo bahr-e-mazar-e-shohada hoti hai

jis ne dekhi ho wo chitwan koi us se puchhe

jaan kyun-kar hadaf-e-tir-e-qaza hoti hai

naza ka waqt bura waqt hai KHaliq ki panah

hai wo saat ki qayamat se siwa hoti hai

ruh to ek taraf hoti hai ruKHsat tan se

aarzu ek taraf dil se juda hoti hai

KHud samajhta hun ki rone se bhala kya hasil

par karun kya yunhi taskin zara hoti hai

raundte phirte hain wo majma-e-aghyar ke sath

KHub tauqir-e-mazar-e-shohada hoti hai

murgh-e-bismil ki tarah loT gaya dil mera

nigah-e-naz ki tasir bhi kya hoti hai

nala kar lene den lillah na chheDen ahbab

zabt karta hun to taklif siwa hoti hai

jism to KHak mein mil jate hue dekhte hain

ruh kya jaane kidhar jati hai kya hoti hai

hun fareb-e-sitam-e-yar ka qail 'akbar'

marte marte na khula ye ki jafa hoti hai