aaj dekhen rang kya dikhlae hai

aaj dekheñ rang kyā dikhlā.e hai

nit nayā jo ruup bhar kar aa.e hai

rafta-o-ā.inda ke andeshe se

jī mirā har haal meñ ghabrā.e hai

dūsroñ kī qabr par ta.amīr-e-qasr

maut kyā tujh ko nahīñ yaad aa.e hai

kyā irāde aadmī ke kyā amal

apnī marzī sab se rab manvā.e hai

sātveñ parde ke andar jo kiyā

sab vo sab ke sāmne aa jaa.e hai

marzī-e-mutlaq tirī qudrat ke khel

chāhe jab phailā.e hai simTā.e hai

dekhtā huuñ jab kisī ko ġham-zadā

jaa.e hai sudh-budh to dil bhar aa.e hai

āshiyāñ banñe se jalne tak kī baat

kahne sunñe kī bhalā kab jaa.e hai

ishq kī rūdād hai bas muḳhtasar

ranj dil ko ranj ko dil khaa.e hai

kaaT lete haiñ kisī Dhab raat din

dekheñ ye bhī kab tak us ko bhaa.e hai

hashr se pahle qayāmat dekh lī

vaqt se pahle bhī vaqt aa jaa.e hai

be-mazā dīvāngī apnī nahīñ

nāsehā tū kyā hameñ samjhā.e hai

go ziyāda apnī qismat kā nahīñ

shukr hai baiThe baiThā.e aa.e hai

zindagī mahdūd hai apnī to kyā

is meñ lā-mahdūdiat aa paa.e hai

ham haiñ dil-bardashta ham haiñ udaas

zāl-e-duniyā naaz kyā dikhlā.e hai

dīn-o-duniyā kī tapish jaatī rahī

zindagānī kī ḳhalish bhī jaa.e hai

ham kahāñ the tere man kī mauj thī

mauj hai mauj aa.e hai aur jaa.e hai

muḳhtasar thī nā-mukammal rah ga.ī

zindagī ke lab pe uf aur haa.e hai

aaj dekhen rang kya dikhlae hai

nit naya jo rup bhar kar aae hai

rafta-o-ainda ke andeshe se

ji mera har haal mein ghabrae hai

dusron ki qabr par tamir-e-qasr

maut kya tujh ko nahin yaad aae hai

kya irade aadmi ke kya amal

apni marzi sab se rab manwae hai

satwen parde ke andar jo kiya

sab wo sab ke samne aa jae hai

marzi-e-mutlaq teri qudrat ke khel

chahe jab phailae hai simTae hai

dekhta hun jab kisi ko gham-zada

jae hai sudh-budh to dil bhar aae hai

aashiyan banne se jalne tak ki baat

kahne sunne ki bhala kab jae hai

ishq ki rudad hai bas muKHtasar

ranj dil ko ranj ko dil khae hai

kaT lete hain kisi Dhab raat din

dekhen ye bhi kab tak us ko bhae hai

hashr se pahle qayamat dekh li

waqt se pahle bhi waqt aa jae hai

be-maza diwangi apni nahin

naseha tu kya hamein samjhae hai

go ziyaada apni qismat ka nahin

shukr hai baiThe baiThae aae hai

zindagi mahdud hai apni to kya

is mein la-mahdudiat aa pae hai

hum hain dil-bardashta hum hain udas

zal-e-duniya naz kya dikhlae hai

din-o-duniya ki tapish jati rahi

zindagani ki KHalish bhi jae hai

hum kahan the tere man ki mauj thi

mauj hai mauj aae hai aur jae hai

muKHtasar thi na-mukammal rah gai

zindagi ke lab pe uf aur hae hai