aaj diwane ka zauq-e-did pura ho gaya

aaj dīvāne kā zauq-e-dīd puurā ho gayā

tujh ko dekhā aur us ke baa'd andhā ho gayā

dhuup ke hāthoñ pe bai'at kar chukī haiñ Tahniyāñ

rang saare sabz pattoñ kā sunahrā ho gayā

kaan dhartā hī nahīñ koī mirī āvāz par

aisā lagtā hai ki saarā shahr murda ho gayā

sāya-e-dīvār ko oḌhe hue the sab ke sab

gir ga.ī dīvār ghar kā ghar barahna ho gayā

jism o jaañ par sozish-e-ġham kā huā yaksāñ asar

sūrateñ sañvlā ga.iiñ jab dard gahrā ho gayā

ḳhvāhishātī irtiqā meñ dab ga.ī hai shaḳhsiyat

nafs moTā ho gayā aur shaḳhs dublā ho gayā

zindagī kī yātrā meñ saath kyā chhūTā tirā

muḳhtasar sā rāsta pal-bhar meñ lambā ho gayā

ġhālib-dānā se pūchho 'ishq meñ paḌ kar salīm

ek ma.aqūl aadmī kaise nikammā ho gayā

aaj diwane ka zauq-e-did pura ho gaya

tujh ko dekha aur us ke ba'd andha ho gaya

dhup ke hathon pe bai'at kar chuki hain Tahniyan

rang sare sabz patton ka sunahra ho gaya

kan dharta hi nahin koi meri aawaz par

aisa lagta hai ki sara shahr murda ho gaya

saya-e-diwar ko oDhe hue the sab ke sab

gir gai diwar ghar ka ghar barahna ho gaya

jism o jaan par sozish-e-gham ka hua yaksan asar

suraten sanwla gain jab dard gahra ho gaya

KHwahishati irtiqa mein dab gai hai shaKHsiyat

nafs moTa ho gaya aur shaKHs dubla ho gaya

zindagi ki yatra mein sath kya chhuTa tera

muKHtasar sa rasta pal-bhar mein lamba ho gaya

ghaalib-dana se puchho 'ishq mein paD kar salim

ek maqul aadmi kaise nikamma ho gaya