آج دل کا عجیب عالم ہے

آج دل کا عجیب عالم ہے

روح بے چین آنکھ پر نم ہے

پھر کسی آرزو کے مٹنے پر

خانۂ دل میں شور ماتم ہے

غم ہستی دیا نوازش کی

یہ نوازش مگر بہت کم ہے

جلوہ فرما ہے بام پر کوئی

چاند تاروں میں روشنی کم ہے

ان کے آنے کی ہے خوشی لیکن

دل کے جانے کا بھی بہت غم ہے

حسن ہے گو سوال پیچیدہ

عشق بھی اک خیال مبہم ہے

ہم کو اپنا خیال ہو کہ نہ ہو

لیکن ان کا خیال پیہم ہے

عشق میں بے بسی ارے توبہ

دل ہے یا کوئی درد پیہم ہے

دھوم ہے جو کلام عابدؔ کی

جوش صاحب کا فیض پیہم ہے