aaj hai isar ka jazba jo parwanon ke pas

aaj hai īsār kā jazba jo parvānoñ ke paas

thī kabhī ye daulat-e-bedār insānoñ ke paas

'aql hai ik āstīñ kā saañp farzānoñ ke paas

be-ḳhudī kitnī baḌī daulat hai dīvānoñ ke paas

kis kī hai duniyā ye āḳhir sāhab-e-ḳhāna hai kaun

mezbāñ dekhā nahīñ koī bhī mehmānoñ ke paas

azmat-e-dīvāngī kā shor farzānoñ meñ hai

hai ġhanīmat ye bhī rah jaa.e jo dīvānoñ ke paas

sham' raushan ho ga.ī aa jaao jalne ke liye

ye ḳhabar jaatā hai le kar kaun parvānoñ ke paas

gaahe ābādī ke siine tak chale aate haiñ dasht

gaahe ābādī pahuñch jaatī hai vīrānoñ ke paas

ashk-e-hasrat soz-e-ġham dard-e-mohabbat dāġh-e-dil

kyā nahīñ sab kuchh hai tere ḳhasta sāmānoñ ke paas

tum na gar aate to khiñch jaate sanam-ḳhāne vahīñ

tum ne ḳhud tauhīn kī aa kar sanam-ḳhānoñ ke paas

nāḳhudā kashtī ke ruḳh ko moḌ langar kaaT de

mujh ko sāhil sā nazar aatā hai tūfānoñ ke paas

dekheñ ab begāne karte haiñ ishāra kis taraf

mujh ko apnoñ ne to pahuñchāyā hai begānoñ ke paas

'rāj' jaane kis tarah karte haiñ sajde barhaman

maiñ to ban jaatā huuñ but jā kar sanam-ḳhānoñ ke paas

aaj hai isar ka jazba jo parwanon ke pas

thi kabhi ye daulat-e-bedar insanon ke pas

'aql hai ek aastin ka sanp farzanon ke pas

be-KHudi kitni baDi daulat hai diwanon ke pas

kis ki hai duniya ye aaKHir sahab-e-KHana hai kaun

mezban dekha nahin koi bhi mehmanon ke pas

azmat-e-diwangi ka shor farzanon mein hai

hai ghanimat ye bhi rah jae jo diwanon ke pas

sham' raushan ho gai aa jao jalne ke liye

ye KHabar jata hai le kar kaun parwanon ke pas

gahe aabaadi ke sine tak chale aate hain dasht

gahe aabaadi pahunch jati hai viranon ke pas

ashk-e-hasrat soz-e-gham dard-e-mohabbat dagh-e-dil

kya nahin sab kuchh hai tere KHasta samanon ke pas

tum na gar aate to khinch jate sanam-KHane wahin

tum ne KHud tauhin ki aa kar sanam-KHanon ke pas

naKHuda kashti ke ruKH ko moD langar kaT de

mujh ko sahil sa nazar aata hai tufanon ke pas

dekhen ab begane karte hain ishaara kis taraf

mujh ko apnon ne to pahunchaya hai beganon ke pas

'raj' jaane kis tarah karte hain sajde barhaman

main to ban jata hun but ja kar sanam-KHanon ke pas