aaj hain kaba-nashin kal sakin-e-but-KHana hum

aaj haiñ ka.aba-nashīñ kal sākin-e-but-ḳhāna ham

apne begāne se yaksāñ rakhte haiñ yārāna ham

ham to qaa.il haiñ tire ai be-ḳhudī-e-ishq jab

ġhair kyā hai ḳhud hoñ apnī yaad se begāna ham

le liyā logoñ ne hāthoñ haath ham pahoñche jahāñ

mahfil-e-ālam meñ haiñ shāyad koī paimāna ham

chashm-e-mast-e-sāqī-e-mad.hosh kī rahtī hai yaad

sāth-sāth apne liye phirte haiñ ik mai-ḳhāna ham

ātish-e-rashk-e-adū se rāt-bhar ai sham.a-rū

terī mahfil meñ jale haiñ sūrat-e-parvāna ham

hijr-e-sāqī meñ hai ye kaifiyyat-e-josh-e-junūñ

pheñkte haiñ toḌte haiñ shīsha-o-paimāna ham

ishq meñ dīvāngī kā naam hai farzāngī

jo na samjhe is ko samjheñge use dīvāna ham

qaid-e-maz.hab se tire pāband-e-ulfat haiñ barī

kyā ġharaz kyoñ jaa.eñ sū-e-ka.aba-o-but-ḳhāna ham

aaj hai is shart par tauba-shikan hone kā qasd

abr udhar chhā.e to chalkā.eñ idhar paimāna ham

dāġh-hā-e-dil chamak kar ab ye kahte haiñ 'fahīm'

hai ye ghar raushan hamīñ se haiñ charāġh-e-ḳhāna ham

aaj hain kaba-nashin kal sakin-e-but-KHana hum

apne begane se yaksan rakhte hain yarana hum

hum to qail hain tere ai be-KHudi-e-ishq jab

ghair kya hai KHud hon apni yaad se begana hum

le liya logon ne hathon hath hum pahonche jahan

mahfil-e-alam mein hain shayad koi paimana hum

chashm-e-mast-e-saqi-e-madhosh ki rahti hai yaad

sath-sath apne liye phirte hain ek mai-KHana hum

aatish-e-rashk-e-adu se raat-bhar ai shama-ru

teri mahfil mein jale hain surat-e-parwana hum

hijr-e-saqi mein hai ye kaifiyyat-e-josh-e-junun

phenkte hain toDte hain shisha-o-paimana hum

ishq mein diwangi ka nam hai farzangi

jo na samjhe is ko samjhenge use diwana hum

qaid-e-mazhab se tere paband-e-ulfat hain bari

kya gharaz kyon jaen su-e-kaba-o-but-KHana hum

aaj hai is shart par tauba-shikan hone ka qasd

abr udhar chhae to chalkaen idhar paimana hum

dagh-ha-e-dil chamak kar ab ye kahte hain 'fahim'

hai ye ghar raushan hamin se hain charagh-e-KHana hum