aaj hoga na tamasha koi hone wala

aaj hogā na tamāshā koī hone vaalā

jā chukā ḳhuun meñ poshāk bhigone vaalā

jis se tā-hashr rag-e-jāñ meñ ujālā karte

daaġh hotā koī be-dāġh na hone vaalā

tak rahā huuñ baḌī muddat se baḌī hasrat se

ghar kī dahlīz pe baiThā hai khilaune vaalā

ahl-e-ġham saare sikandar kī taraf lauT ga.e

ab sar-e-dār charāġhāñ nahīñ hone vaalā

tum bhī is shahr meñ ban jāoge patthar jaise

hañsne vaalā hai yahāñ koī na rone vaalā

ḳhvāb-dar-ḳhvāb hai vo tīra-shabī kā 'ālam

tū bhī aa.e to charāġhāñ nahīñ hone vaalā

mīr-e-manzil se tabāhī kā sabab kyā pūchheñ

duur baiThā hai safīne ko Dubone vaalā

chādar-e-gul ke parastār kahāñ ho 'māhir'

DhūñDhtā hai tumheñ sahrā meñ bichhaune vaalā

aaj hoga na tamasha koi hone wala

ja chuka KHun mein poshak bhigone wala

jis se ta-hashr rag-e-jaan mein ujala karte

dagh hota koi be-dagh na hone wala

tak raha hun baDi muddat se baDi hasrat se

ghar ki dahliz pe baiTha hai khilaune wala

ahl-e-gham sare sikandar ki taraf lauT gae

ab sar-e-dar charaghan nahin hone wala

tum bhi is shahr mein ban jaoge patthar jaise

hansne wala hai yahan koi na rone wala

KHwab-dar-KHwab hai wo tira-shabi ka 'alam

tu bhi aae to charaghan nahin hone wala

mir-e-manzil se tabahi ka sabab kya puchhen

dur baiTha hai safine ko Dubone wala

chadar-e-gul ke parastar kahan ho 'mahir'

DhunDhta hai tumhein sahra mein bichhaune wala