aaj jo itni sargirani hai

aaj jo itnī sargirānī hai

is meñ poshīda ik kahānī hai

kyā yaqīñ ho ki aaj mānegā

pahle kab us ne baat maanī hai

saaya Dhalne lagā hai peḌoñ kā

piirī ab hāsil-e-javānī hai

hai ragoñ meñ to ḳhuun hai lekin

aañkh meñ aa.e to vo paanī hai

surḳh tan surḳh-rū jo aaya huuñ

shahr vāloñ kī mehrbānī hai

tanz hī vo kare kare to sahī

us kī to ye bhī mehrbānī hai

mamlikat terī jism-o-jāñ mere

merā dil terī rājdhānī hai

kis kī aamad hai aaj gulshan meñ

kis kī ḳhātir ye gul-fishānī hai

sar pe chaḌh aaya hai jo yuuñ sūraj

ye tanazzul kī ik nishānī hai

hai aTal sab ke vāste 'ḳhāvar'

vo jo ik marg-e-nā-gahānī hai

aaj jo itni sargirani hai

is mein poshida ek kahani hai

kya yaqin ho ki aaj manega

pahle kab us ne baat mani hai

saya Dhalne laga hai peDon ka

piri ab hasil-e-jawani hai

hai ragon mein to KHun hai lekin

aankh mein aae to wo pani hai

surKH tan surKH-ru jo aaya hun

shahr walon ki mehrbani hai

tanz hi wo kare kare to sahi

us ki to ye bhi mehrbani hai

mamlikat teri jism-o-jaan mere

mera dil teri rajdhani hai

kis ki aamad hai aaj gulshan mein

kis ki KHatir ye gul-fishani hai

sar pe chaDh aaya hai jo yun suraj

ye tanazzul ki ek nishani hai

hai aTal sab ke waste 'KHawar'

wo jo ek marg-e-na-gahani hai