آج جو اتنی سرگرانی ہے

آج جو اتنی سرگرانی ہے

اس میں پوشیدہ اک کہانی ہے

کیا یقیں ہو کہ آج مانے گا

پہلے کب اس نے بات مانی ہے

سایہ ڈھلنے لگا ہے پیڑوں کا

پیری اب حاصل جوانی ہے

ہے رگوں میں تو خون ہے لیکن

آنکھ میں آئے تو وہ پانی ہے

سرخ تن سرخ رو جو آیا ہوں

شہر والوں کی مہربانی ہے

طنز ہی وہ کرے کرے تو سہی

اس کی تو یہ بھی مہربانی ہے

مملکت تیری جسم و جاں میرے

میرا دل تیری راجدھانی ہے

کس کی آمد ہے آج گلشن میں

کس کی خاطر یہ گل فشانی ہے

سر پہ چڑھ آیا ہے جو یوں سورج

یہ تنزل کی اک نشانی ہے

ہے اٹل سب کے واسطے خاورؔ

وہ جو اک مرگ ناگہانی ہے