aaj-kal kaba kalisa ho gaya

āj-kal ka.aba kalīsā ho gayā

dil par ik kāfir kā qabza ho gayā

daf.atan dil ko mire kyā ho gayā

kis pe maa.il kis pe shaidā ho gayā

be-qarārī kā sabab khultā nahīñ

baiThe baiThe ye mujhe kyā ho gayā

lā-davā kyoñ ho gayā merā maraz

kyā ḳhafā mujh se masīhā ho gayā

vo ye farmāte haiñ ham samjhe nahīñ

mudda.ā goyā muammā ho gayā

be-ta.alluq ho ga.e duniyā se ham

jab se dil ko ishq terā ho gayā

ab nahīñ pahchāntā koī mujhe

fart-e-ġham se ab ye naqsha ho gayā

kar diyā mahv un ko un ke husn ne

dekh kar ā.īna saktā ho gayā

sun ke sākit sab hue 'hāmid' ke sher

dam-ba-ḳhud jalse kā jalsa ho gayā

aaj-kal kaba kalisa ho gaya

dil par ek kafir ka qabza ho gaya

dafatan dil ko mere kya ho gaya

kis pe mail kis pe shaida ho gaya

be-qarari ka sabab khulta nahin

baiThe baiThe ye mujhe kya ho gaya

la-dawa kyon ho gaya mera maraz

kya KHafa mujh se masiha ho gaya

wo ye farmate hain hum samjhe nahin

muddaa goya muamma ho gaya

be-talluq ho gae duniya se hum

jab se dil ko ishq tera ho gaya

ab nahin pahchanta koi mujhe

fart-e-gham se ab ye naqsha ho gaya

kar diya mahw un ko un ke husn ne

dekh kar aaina sakta ho gaya

sun ke sakit sab hue 'hamid' ke sher

dam-ba-KHud jalse ka jalsa ho gaya