آج کل کعبہ کلیسا ہو گیا

آج کل کعبہ کلیسا ہو گیا

دل پر اک کافر کا قبضہ ہو گیا

دفعتاً دل کو مرے کیا ہو گیا

کس پہ مائل کس پہ شیدا ہو گیا

بے قراری کا سبب کھلتا نہیں

بیٹھے بیٹھے یہ مجھے کیا ہو گیا

لا دوا کیوں ہو گیا میرا مرض

کیا خفا مجھ سے مسیحا ہو گیا

وہ یہ فرماتے ہیں ہم سمجھے نہیں

مدعا گویا معما ہو گیا

بے تعلق ہو گئے دنیا سے ہم

جب سے دل کو عشق تیرا ہو گیا

اب نہیں پہچانتا کوئی مجھے

فرط غم سے اب یہ نقشہ ہو گیا

کر دیا محو ان کو ان کے حسن نے

دیکھ کر آئینہ سکتا ہو گیا

سن کے ساکت سب ہوئے حامدؔ کے شعر

دم بخود جلسے کا جلسہ ہو گیا