aaj-kal ushshaq ka diwala nikla jae hai

āj-kal 'ushshāq kā dīvāla niklā jaa.e hai

husn kī farmā.ishoñ kā tax baḌhtā jaa.e hai

ek 'āshiq ġham kā hai ik shādmānī par nisār

koī uttar koī dakhkhin jis ko jo bhā jaa.e hai

bul-havas to nārasā-e-auj-e-bām-e-ishq hai

jis jagah kaanā na pahuñche vaañ pe andhā jaa.e hai

influenza meñ haiñ 'ushshāq aksar mubtalā

kūcha-e-jānāñ mukammal ward bantā jaa.e hai

dosto tum ko sutūñ banñā hai urdu ke liye

varna bārish se ta'assub kī ye ghar Dhah jaa.e hai

sirf iskīmoñ pe mansūbe kā hai dār-o-madār

mashvare hote haiñ jaise ḳhvāb dekhā jaa.e hai

har zamīn-e-sher meñ ġhalla ugaao kī muhim

fikr ke hal se yahāñ avsar ko jotā jaa.e hai

aaj-kal 'ushshaq ka diwala nikla jae hai

husn ki farmaishon ka tax baDhta jae hai

ek 'ashiq gham ka hai ek shadmani par nisar

koi uttar koi dakhkhin jis ko jo bha jae hai

bul-hawas to narasa-e-auj-e-baam-e-ishq hai

jis jagah kana na pahunche wan pe andha jae hai

influenza mein hain 'ushshaq aksar mubtala

kucha-e-jaanan mukammal ward banta jae hai

dosto tum ko sutun banna hai urdu ke liye

warna barish se ta'assub ki ye ghar Dhah jae hai

sirf iskimon pe mansube ka hai dar-o-madar

mashware hote hain jaise KHwab dekha jae hai

har zamin-e-sher mein ghalla ugao ki muhim

fikr ke hal se yahan awsar ko jota jae hai