aaj ki kya fikr ho kya kal ka andesha karen

aaj kī kyā fikr ho kyā kal kā andesha kareñ

hai yahī jiinā to is jiine pe kyā takiya kareñ

ḳhār-hā-e-rāh ko pairoñ se kab tak rauñdiye

tā-ba-ke ḳhush-fahmiyoñ ko nazr-e-ā.inda kareñ

un kā ahd-e-hukmrānī kho chukā apnā bharam

kāvisheñ apnī vo har har moḌ par kanda kareñ

mauritius meñ ahl-e-dil kī shān-e-dildārī na pūchh

jaan se apnoñ ko māreñ ġhair ko zinda kareñ

kah ga.e hoñge surūr-angez lai meñ kuchh se kuchh

kyā zarūrī hai ki vo puurā bhī ab va.ada kareñ

bandagī aisī bhī kyā jis meñ ḳhulūs-e-dil na ho

ḳhvāhish-e-jannat meñ kyoñ sajdoñ ko ālūda kareñ

muntazir haiñ jaane kab se un ke mushtāqān-e-dīd

āte-jāte vo kahīñ mil jaa.eñ to sajda kareñ

un pareshāñ-hāl chehroñ kī udāsī kyā kahūñ

jāñ-fishānī kar ke din kī shab ko jo faaqa kareñ

ḳhud pukār uTThegī har chashm-e-tajassus āfrīñ

munkashif kyūñkar ham un ke rāz-e-sar-basta kareñ

bā-farāġhat zindagī kī hai ye shart-e-avvalīñ

ik barahman-zād ko ham roz-o-shab sajda kareñ

aaj ki kya fikr ho kya kal ka andesha karen

hai yahi jina to is jine pe kya takiya karen

KHar-ha-e-rah ko pairon se kab tak raundiye

ta-ba-ke KHush-fahmiyon ko nazr-e-ainda karen

un ka ahd-e-hukmrani kho chuka apna bharam

kawishen apni wo har har moD par kanda karen

mauritius mein ahl-e-dil ki shan-e-dildari na puchh

jaan se apnon ko maren ghair ko zinda karen

kah gae honge surur-angez lai mein kuchh se kuchh

kya zaruri hai ki wo pura bhi ab wada karen

bandagi aisi bhi kya jis mein KHulus-e-dil na ho

KHwahish-e-jannat mein kyon sajdon ko aaluda karen

muntazir hain jaane kab se un ke mushtaqan-e-did

aate-jate wo kahin mil jaen to sajda karen

un pareshan-haal chehron ki udasi kya kahun

jaan-fishani kar ke din ki shab ko jo faqa karen

KHud pukar uTThegi har chashm-e-tajassus aafrin

munkashif kyunkar hum un ke raaz-e-sar-basta karen

ba-faraghat zindagi ki hai ye shart-e-awwalin

ek barahman-zad ko hum roz-o-shab sajda karen