aaj kisi ki yaad mein hum ji bhar kar roe dhoya ghar

aaj kisī kī yaad meñ ham jī bhar kar ro.e dhoyā ghar

aaj hamārā ghar lagtā hai kaisā ujlā ujlā ghar

apne aa.eñ sar āñkhoñ par ġhair kī ye baiThak na bane

ghar aaseb kā ban jā.egā varna hañstā-bastā ghar

ghar ko jab ham jhāḌeñ-pochheñ rahte haiñ mohtāt bahut

gard-ālūd nahīñ hone dete ham ham-sā.e kā ghar

tum ne kaḌiyāñ jhelīñ aur ġhairoñ ke ghar ābād kiye

raah tumhārī taktā hai ābā.ī suunā suunā ghar

jo ārām hai apne ghar meñ aur kahāñ mil saktā hai

TūTā-phūTā bhī ho to bhī apnā ghar hai apnā ghar

ik anjāne Dar ne niiñd uchak lī sab kī āñkhoñ se

kitnī hī rātoñ se musalsal be-ārām hai ghar kā ghar

merī ruuh birogan rah rah kar chillātī rahtī hai

merā ghar merā pyārā ghar merā pyārā pyārā ghar

āvāragardī ke sabab vo din-bhar to mat.ūn rahā

jab sūraj maġhrib meñ Duubā 'ja.afar' bhī jā pahuñchā ghar

aaj kisi ki yaad mein hum ji bhar kar roe dhoya ghar

aaj hamara ghar lagta hai kaisa ujla ujla ghar

apne aaen sar aankhon par ghair ki ye baiThak na bane

ghar aaseb ka ban jaega warna hansta-basta ghar

ghar ko jab hum jhaDen-pochhen rahte hain mohtat bahut

gard-alud nahin hone dete hum ham-sae ka ghar

tum ne kaDiyan jhelin aur ghairon ke ghar aabaad kiye

rah tumhaari takta hai aabai suna suna ghar

jo aaram hai apne ghar mein aur kahan mil sakta hai

TuTa-phuTa bhi ho to bhi apna ghar hai apna ghar

ek anjaane Dar ne nind uchak li sab ki aankhon se

kitni hi raaton se musalsal be-aram hai ghar ka ghar

meri ruh birogan rah rah kar chillati rahti hai

mera ghar mera pyara ghar mera pyara pyara ghar

aawaragardi ke sabab wo din-bhar to matun raha

jab suraj maghrib mein Duba 'jafar' bhi ja pahuncha ghar