aaj main hun sham hai saqi hai daur-e-jam hai

aaj maiñ huuñ shaam hai saaqī hai daur-e-jām hai

paañv kī Thokar pe apnī gardish-e-ayyām hai

baaġh meñ titlī hai gul hai husn-e-lāla-fām hai

chāñdnī hai raqs meñ rañgīniyoñ kī shaam hai

be-hisī kahiye ise yā ḳhūgar-e-ġham jāniye

apnī nākāmī pe bhī ḳhush ye dil-e-nākām hai

ham ko in se hai tavaqqo vo sarāpā haiñ gurez

haiñ vafā nā-āshnā ham par yahī ilzām hai

kaun ruḳhsat ho gayā devī ġhazal kī ro rahī

shahar meñ sher-o-suḳhan ke ik machā kohrām hai

ik zarā sā dil hai aur duniyā jahāñ kī āfateñ

saiñkaḌoñ ġham ke charāġhoñ se sajā ye baam hai

merī 'farhat' shā.irī is be-suḳhan kī den hai

shā.irī kyā zindagānī bhī usī ke naam hai

aaj main hun sham hai saqi hai daur-e-jam hai

panw ki Thokar pe apni gardish-e-ayyam hai

bagh mein titli hai gul hai husn-e-lala-fam hai

chandni hai raqs mein ranginiyon ki sham hai

be-hisi kahiye ise ya KHugar-e-gham jaaniye

apni nakaami pe bhi KHush ye dil-e-nakaam hai

hum ko in se hai tawaqqo wo sarapa hain gurez

hain wafa na-ashna hum par yahi ilzam hai

kaun ruKHsat ho gaya dewi ghazal ki ro rahi

shahar mein sher-o-suKHan ke ek macha kohram hai

ek zara sa dil hai aur duniya jahan ki aafaten

sainkaDon gham ke charaghon se saja ye baam hai

meri 'farhat' shairi is be-suKHan ki den hai

shairi kya zindagani bhi usi ke nam hai