aaj mujh sa is jahan mein be-nawa koi nahin

aaj mujh sā is jahāñ meñ be-navā koī nahīñ

kis ko maiñ apnā kahūñ jab āshnā koī nahīñ

sar ko dhun luuñ maiñ ki pīTūñ dil jigar ko kyā karūñ

ham-nashīñ hamdam na mahram ham-navā koī nahīñ

ye shikāyat hī sahī lekin hai apne baḳht se

dosto tum se hameñ shikva gila koī nahīñ

be-niyāzī kī adā āḳhir ko un se siikh lī

kyā chale ho pūchhne jab mudda.ā koī nahīñ

naqsh-e-hairat haiñ mire ahbāb tāroñ kī tarah

sab kī āñkheñ haiñ khulī par dekhtā koī nahīñ

ye tumhārī sādgī bhī to balā-e-jān hai

ishva-o-ġhamza nahīñ nāz-o-adā koī nahīñ

naqsh-bar-dīvār huuñ aa kar tumhārī bazm meñ

log sūrat dekhte haiñ pūchhtā koī nahīñ

dekhne meñ kis qadar dilkash haiñ rangīñ naqsh-e-gul

log phir bhī kahte haiñ bū-e-vafā koī nahīñ

ab guloñ par ḳhaar ko tarjīh dī jaane lagī

is chaman meñ ham-nafas bulbul tirā koī nahīñ

ye sila merī vafā kā de ke vo bhī chal diye

umr bhar kī talḳhiyāñ haiñ aasrā koī nahīñ

phir kisī ne ik sadā mānūs dī hai dekhnā

jabki is duniyā meñ apnā ham-navā koī nahīñ

doctor 'dīvān' sāhib aa.e bhī to kyā kareñ

is marīz-e-ishq ke dil kī davā koī nahīñ

aaj mujh sa is jahan mein be-nawa koi nahin

kis ko main apna kahun jab aashna koi nahin

sar ko dhun lun main ki piTun dil jigar ko kya karun

ham-nashin hamdam na mahram ham-nawa koi nahin

ye shikayat hi sahi lekin hai apne baKHt se

dosto tum se hamein shikwa gila koi nahin

be-niyazi ki ada aaKHir ko un se sikh li

kya chale ho puchhne jab muddaa koi nahin

naqsh-e-hairat hain mere ahbab taron ki tarah

sab ki aankhen hain khuli par dekhta koi nahin

ye tumhaari sadgi bhi to bala-e-jaan hai

ishwa-o-ghamza nahin naz-o-ada koi nahin

naqsh-bar-diwar hun aa kar tumhaari bazm mein

log surat dekhte hain puchhta koi nahin

dekhne mein kis qadar dilkash hain rangin naqsh-e-gul

log phir bhi kahte hain bu-e-wafa koi nahin

ab gulon par KHar ko tarjih di jaane lagi

is chaman mein ham-nafas bulbul tera koi nahin

ye sila meri wafa ka de ke wo bhi chal diye

umr bhar ki talKHiyan hain aasra koi nahin

phir kisi ne ek sada manus di hai dekhna

jabki is duniya mein apna ham-nawa koi nahin

doctor 'diwan' sahib aae bhi to kya karen

is mariz-e-ishq ke dil ki dawa koi nahin